“अजित पवारांनी बारामतीला पाणी पळवले, पण विजयदादांशी थेट संघर्ष नव्हता!” धैर्यशील मोहिते पाटलांचा मोठा खुलासा

हाराष्ट्राच्या राजकारणात नेहमीच चर्चेत असणारा विजयसिंह मोहिते पाटील आणि अजित पवार यांच्यातील कथित राजकीय संघर्ष आणि बारामतीसाठी पाणी वाटपाचा वाद पुन्हा एकदा चर्चेत आला आहे.
माढ्याचे खासदार धैर्यशील मोहिते पाटील यांनी या विषयावर एका मराठी वृत्तवाहिनीला दिलेल्या मुलाखतीत बेधडकपणे भाष्य केले आहे.
अजित पवारांनी बारामतीला जास्त पाणी नेल्याचा आरोप मान्य केला, परंतु विजयसिंह मोहिते पाटील आणि अजित पवार यांच्यात थेट राजकीय संघर्ष नसल्याचे धैर्यशील मोहिते पाटील यांनी स्पष्ट केले. यासोबतच त्यांनी पाणी वाटपात पारदर्शकता आणि सर्व तालुक्यांना समान न्याय देण्याची मागणी केली. धैर्यशील मोहिते पाटील यांनी नीरा व्हॅली प्रकल्पाच्या वादाचाही उल्लेख करत काही नेत्यांवर स्वतःचे अपयश लपवण्यासाठी मोठ्या नेत्यांची नावे वापरण्याचा आरोप केला आहे.
विजयदादा आणि अजित पवार यांच्यातील वादाची पार्श्वभूमी
महाराष्ट्राच्या राजकारणात विजयसिंह मोहिते पाटील आणि अजित पवार
यांच्यातील कथित संघर्षाची चर्चा गेल्या अनेक वर्षांपासून सुरू आहे. विशेषतः नीरा व्हॅली प्रकल्पाच्या पाणी वाटपावरून सोलापूर आणि बारामती यांच्यातील
तालुक्यांमध्ये तणाव निर्माण झाला होता. धैर्यशील मोहिते पाटील यांनी याबाबत स्पष्टता आणताना सांगितले की, “विजयदादा आणि अजितदादांचा थेट राजकीय संघर्ष कधीच नव्हता.

अजित पवारांनी पाणी पळवले का?
अजित पवारांनी बारामतीला जास्त पाणी नेल्याचा आरोप दीर्घकाळ चर्चेत आहे. यावर धैर्यशील मोहिते पाटील यांनी स्पष्टपणे सांगितले, “होय, अजितदादांनी काही प्रमाणात पाणी नेले आहे. पण ते आज उपमुख्यमंत्री आहेत, आणि त्यांचे कार्यकर्ते
त्यांना मुख्यमंत्री बनवण्याची मागणी करतात. मग त्यांनी सर्व तालुक्यांना समान पाणीवाटप व्हावे यासाठी प्रयत्न करावेत.”
2019 मध्ये नीरा व्हॅली प्रकल्पाच्या पाणी वाटपावरून बारामतीला जास्त पाणी मिळाल्याचा मुद्दा उपस्थित झाला होता. यावर रणजितसिंह नाईक निंबाळकर यांनी तेव्हा आवाज उठवला होता, पण आता ते गप्प का आहेत, असा सवाल धैर्यशील यांनी उपस्थित केला. “पाणी वाटप न्याय्य पद्धतीने व्हायला हवे. सर्व नेत्यांनी एकत्र बसून कोणावर अन्याय होणार नाही, असे नियोजन करावे, असे धैर्यशील मोहिते पाटील म्हणाले.
काही नेत्यांवर टीकास्त्र
धैर्यशील यांनी काही नेत्यांवर अप्रत्यक्षपणे टीका करताना सांगितले, “मोठ्या नेत्यांची नावे घेऊन गल्लीत कालवा बांधण्याची काहींना सवय आहे. स्वतःचे अपयश लपवण्यासाठी समाजात खोटे मुद्दे पसरवले जातात. कोणता प्रकल्प आणला, कोणते काम केले, हे सांगावे.” त्यांनी विजयसिंह मोहिते पाटील यांनी नितीन गडकरी यांच्याकडून मंजूर केलेला रेल्वे प्रकल्प पूर्ण होत असल्याचा दाखला दिला, आणि इतर नेत्यांना विकासकामांचे उदाहरण देण्याचे आव्हान दिले. मोहिते पाटील आणि पवार कुटुंब; राजकीय संदर्भ काय?
विजयसिंह मोहिते पाटील यांनी 2019 मध्ये भाजपला पाठिंबा दिला होता, परंतु 2024 मध्ये धैर्यशील मोहिते पाटील यांनी राष्ट्रवादी काँग्रेस (शरदचंद्र पवार) पक्षात प्रवेश केला आणि माढा लोकसभा मतदारसंघातून निवडणूक लढवली. तसेच नीरा व्हॅली प्रकल्प आणि उजनी धरण यांच्या पाणी वाटपावरून सोलापूर
आणि बारामती यांच्यातील तालुक्यांमध्ये तणाव आहे. सुप्रिया सुळे यांनी 24 फेब्रुवारी 2024 रोजी अजित पवार यांच्याशी पाणी समस्येवर चर्चा केली होती, परंतु हा मुद्दा अजूनही कायम आहे.